Филмот „17“ на режисерката Косара Митиќ ќе ја има светската премиера на 18 февруари (19 часот) во „Блумакс театар“ во рамките на престижниот Берлински филмски фестивал, што започна синоќа. Ова е особено значаен момент за македонската кинематографија да имаме филм во програмата „Перспективи“ на Берлинале, програма која ги претставува и оценува најдобрите долгометражни дебитантски филмови од целиот свет, велат од Агенцијата за филм.
Филмот ќе има вкупно пет фестивалски проекции на Берлинале, на различни локации, што дополнително ја потврдува силната видливост и интересот за овој македонски филм во рамки на фестивалската програма. Фактот што станува збор за дебитантски долгометражен филм на млада македонска режисерка дополнително ја потврдува виталноста и потенцијалот на новата генерација автори, како и значењето на континуираната институционална поддршка за развој на современиот македонски филм.
Филмот „17“ е продуциран од „Црна мачка продукција“, со финансиска поддршка на македонската Агенција за филм, во копродукција со „Арт & Попкорн“ (Србија) и „Децембер“ (Словенија). Проектот е поддржан и од Филмскиот центар на Србија, Словенечкиот филмски центар, SEE Cinema Network, како и преку програмата CineLink – Work in Progress на 31. Сараевски филмски фестивал.
Агенцијата за филм и оваа година ќе биде присутна со свој промотивен штанд на Европскиот филмски маркет (European Film Market – EFM), што се одржува до 18 февруари во рамките на фестивалот.
Македонскиот штанд ќе биде поставен на централна локација во музејот „Гропиус Бау“, каде традиционално се одвива индустрискиот дел на фестивалот. Преку присуството на маркетот, македонската делегација ќе ги претстави најновите остварувања и актуелни проекти од домашната кинематографија, како и ќе реализира средби со потенцијални меѓународни партнери со цел воспоставување идни копродукциски соработки. За таа намена подготвен е специјален промотивен каталог, како и обемен промотивен материјал.
Покрај физичкото присуство со промотивен штанд, Агенцијата за филм ќе биде активна и на онлајн-платформата на Европскиот филмски маркет, овозможувајќи им на филмските професионалци кои нема да присуствуваат во Берлин да ги следат активностите и содржините во виртуелен формат.
Европскиот филмски маркет во Берлин е еден од највлијателните светски филмски пазари и клучна платформа за меѓународно позиционирање на националните кинематографии. Континуираното присуство на Агенцијата за филм на овој маркет овозможува зголемена видливост на македонските автори и продукции, јакнење на меѓународната соработка, размена на искуства и пристап до нови извори на финансирање, со што директно се придонесува кон развојот и одржливоста на домашната филмска индустрија.
